أهداني الدكتور مصطفى الحلوة مجموعة رائعة من كتبه أوحت لي بهذه القصيدة:
ـ1ـ
"مصطفى الحلوة" سرقني كتير
من ناس حبّيتُن بـ هالغربه
وقللي: بكتبي شغّل التفكير
في فلسفه.. تا تفهما صعبه
ـ2ـ
بعد الكبر صفّيت طفل زغير
حاضن الكلمه.. مقعّدا جنبي
وبالصف في أستاذ إسمو كبير
دكتور.. زتّ النور بـ دربي
ـ3ـ
حملت السعاده وقلت بدّي طير
صوب الوطن تا إسرقو لصوبي
وتا يضلّ حدّي وإفهم التفسير
فتحت الصدر تا يسكن بقلبي
ـ4ـ
يا "مصطفى" الأيام جمعتنا
رغم البعد.. قويت محبتنا
حروفك دهب ومطعمه بياقوت
زرعتْ وطن بجنون غربتنا
ـ5ـ
وع أرض سيدني وصّلتْ "بيروت"
و"طرابلس".. أهلا بحبيبتنا
بكتبك ما في صفحات.. شفت بيوت
ومشعشعه بنورك ثقافتنا
ـ6ـ
كلماتنا للناس أطيب قوت
عم ينطروا من الجوع خبزتنا
يا "مصطفى".. نحنا إذا منموت
ع طول رح بتعيش كلمتنا
**
درب الحكي
حفل توقيع كتاب الدكتور مصطفى الحلوة: شربل بعيني بين الفصحى والعامية في مسقط رأس الشاعر: بلدة مجدلياـ شباط 2022
ـ1ـ
يسعد مساكن من أرض سيدني
من خلف سبع بحور يا أحباب
عنكن الغربه صعب تبعدني
وديت دمعي ينوب عني اليوم
دمعي وصل.. قوموا افتحولوا الباب
ـ2ـ
بشباط إمي خلّفتني.. وصار
أقصر شهر مكتوب بـ إسمي
وبآخرو في كبار زرعوا نهار
تا بغربتي تتفرفط العتمه
تا إشكرن.. ما بتنفع الأشعار
أكبر من الأشعار والكلمه
ـ3ـ
يا مصطفى الحلوه شو بدّي قول
ما عاد عندي شعر تا إهديك
ختيار صرت.. بغربتي مقتول
ومجبور من دمعة فرح إسقيك
بقلبي إنتْ.. يا مصطفى محمول
مفضل ع شعري.. ربّنا يقوّيك
حبّ أهلي بمجدليا.. وجول
بشوارعا تا شوارعا تحييك
وفي بيت ناطر طلتي ع طول
تصوّر معو.. ع شرط ما يبكّيك
بنت المجد تا تكرمك معقول
ومن مجدها حب ووفا تعطيك
بس اللي مش معقول.. مش معقول
بعصر الكورونا صعب تا لاقيك
ـ4ـ
ويمين محسن.. كلمتو إبداع
هنيّال يللي بكلمتو انتفعوا
عندو أدب متل الدهب لمّاع
ما بينشرى مهما البشر دفعوا
إسمو علم خفّاق.. صيتو شاع
وبمجدليا هالعلم رفعوا
ـ5ـ
مخاييل بيّك يرحم ترابو
كان "الفرح" بيزيّن شْبابو
وكان الشعر عندو: صداقه وحب
يا وليد مشيت ذات الدرب
حتّى الشعر ما يغيب بغيابو
ـ6ـ
وسوزان البعيني ع كلمتها
وقف النسر.. قال الجبل عالي
الأجيال عم تمشي ع حكمتها
إنّو الوطن مهما افتقر.. غالي
زارت الغربه.. سرقت بسمتها
وبعدا البسمه عايشه ببالي
ـ7ـ
وجوزيت بنت المقدسي الفنان
بعدو لهلق عايش بفنّو
ع العود لمن دوزن الألحان
الأوتار صاروا بنغمتو يجنّوا
وطلت البنت بصوتها الرنان
مع جوقتا.. تا يعيش فن البيّ
نبشوا تراثو.. وبلشوا يغنّوا
ـ8ـ
درب الحكي.. رح تنتهي هالدرب
ومعقول بكرا تنمحى مشاوير
بيبقى شخص إنسان جوّا القلب
حامي الأدب.. بيحب شعري كتير
عبّود جبرايل.. يا أجمل أب
مهما انحكى أكبر من التقدير
كاهن رعيّه مبارك من الرب
رمز الطهاره والوفا والحب
هيدا أبونا.. البالقداسه كبير
ـ9ـ
ويا مجدليا الرافعه راسي
ومتل الحلم عشتي بإحساسي
ضلّي اذكريني وصورتي ضمّي
يمكن بـ هجري ينتهي كاسي
ابنك أنا.. من ميّتك دمّي
وكمشة تراب بغربتي ناسي
آخر وصيّه.. خففي همّي
وان متّ هون.. بحلّفك يمّي
بكنيستك.. بيكون قدّاسي
**
مصطفى وعصام
حفل تكريم الدكتور مصطفى الحلوة بتاريخ 10/12/2020:
ـ1ـ
وْلِكْ.. كيف بدّي كيف إشكركُنْ
والخير كلّو من بيادركُنْ
يا ريت فيي جمّع الدمعات
تا تسكبوها في محابركُنْ
من حبّكُن عم إشرب الجرعات
جرعات شهدتلا منابركُنْ
إنتو إذا بتوَقِّف الساعات
بْتُوقَف تا تحكي عن مآثركُنْ
بالشعر أو بالنثر في لمعات
بسطوركُن بتشع شعلة نور
بلون الدهب ورقة دفاتركُنْ
ـ2ـ
ويا مصطفى الحلوه.. كتابك صار
شلال.. للعطشان من شعبي
متل الكذب.. كل ما يمرّ نهار
بحلم تا شوفك قاعد بجنبي
بحروف حبَّك صرت تطفي النار
بعصر "الكورونا" مع ألف ضربه
رح خبّرك عن مبدع وجبّار
إسمو "عصام" وساكن بقلبي
أسس جوايز.. كللا بالغار
موتو طعنّي وظاهره الحربه
إنتَ وعصام.. وْمع أسامي كتار
زرعتوا الفرح بظروفنا الصعبه
لا الأرض ندهتنا وْلا هاك الدار
منبكي وقت ما منسمع الأخبار
مكتوب إنّو نموت بالغربه
ـ3ـ
لولا "الكورونا" كنت شفتك هون
جايي وحامل أرزة بلادي
يا مصطفى نحنا بأبعد كون
وقرّبتنا من بعضنا زْياده
كتابك حروفو بألف لون ولون
متل الزهر.. والشعر سجّاده
من طرابلس مدّيت إلنا العون
من بلاد هيي الحلم شو ما صار
كل القلوب بتعبدا عباده
ـ4ـ
رح إشكرك تا يصير يحكي الشكر
ويخبّرك قدّيش ممنونك
ذكرك ببالي صار أحلى ذكر
يا مصطفى شو ما طلبت رح قول:
شربل بأمرك.. تكرم عيونك
**
اكليل غار
ـ1ـ
من سيدني جايي قلّك
صفّى بالقلب محلّك
يا مصطفى.. حرفي صار
يتشاوف فيك.. يجلّك
ـ2ـ
تكريمك إكليل الغار
بعتم الغربه زرعت نهار
يا كبير ورافقت كبار
نحنا منتفيّا بظلّك
**
