سوزان

إلى روح زهرة مجدليا الأديبة سوزان بعيني

ـ1ـ

كذبه حياة الناس يا ربي

ومنعيش نحنا هيك بالكذبه

سوزان البعيني قمرها غاب

وغابت معو نجمات المحبه

ـ2ـ

إسما علم زيّن غلاف كتاب

إسما وطن مزروع بـ قلبي

يا مجدليا خففي المصاب

موتا ألم.. موتا جرح حربه

ـ3ـ

كرّمتني.. شلّعت الغياب

ومحيت سنيني العشتها بغربه

المتلا صعب تا يموت يا أحباب

سوزان رح تبقى ع طول العمر

طلبة صلا.. ومنردد الطلبه

**

قمر نيسان

الى الاديبة سوزان الياس بعيني بماسبة صدور كتابها "أناشيد الحب والفرح".

ـ1ـ

صوتِك إجا من بعيد

حامل صدى "أْناشيد

حب وفرح".. سكران

والحرف كاس نبيد

ـ2ـ

كتابك قمر نيسان

وإنتي الشمس بالعيد

كتابك فكر جبران

مجبول بالتجديد

ـ3ـ

شفت الأدب يئسان

وغرقان بالتنهيد

واقف ورا النسيان

والغبره عم بتزيد

ـ4ـ

واليوم يا سوزان

بيلبقلك التمجيد

صار الأدب فرحان

عم يبتدي من جديد

**

أهلا سوزان 

يوم زارتنا الشاعرة سوزان بعيني عام 2012

فرحانين كتير نحنا يا سوزان

بْهالطلّة الـ مسحتْ دمع هجران

لمّن ع سيدني.. نور وجِّك هَلّ

بعتم الهجر شعّت شمس نيسان

من مجدليّا.. محمّلينك فلّ

تا توزّعي الأزهار وين ما كان

رح ترجعي.. وبالقلب رح بتضلّ

ضحكه حنونه.. صوتها رنّان

رح ترجعي.. وأكبر خطيّه تفلّ

وتترك عينينا.. وردة البستان

يا بعينيّه.. الـ بِعين الكل

قونة وفا.. عم يحرسا الديّان

يا كلمة اللي حروفنا بتجلّ

يا بنت ضيعه مسوسحه الأكوان

منموت.. لكن صعب تا ننذلّ

جنود نحنا بخدمة الأوطان

وقفت دني.. وصارت علينا تدلّ

وتقول: هودي شرّفوا الانسان

هودي اللي صاحوا فوق أعلى تلّ:

كل نقطة دمّ بالشريان

بتفدي الأرزه اللي بجبل لبنان

**