الى روح صديق الشباب والدراسة الفنان شربل نعيمي 29 ايار 2018
ـ1ـ
شربل بعيني وشربل نعيمي
رفاق كنا من زمان بعيد
من الأرض يمكن سرقتو الغيمه
حتى يشتّي ع الدني مواعيد
ـ2ـ
يا ما بشر نادوه بـ إسمي
ويا ما بإسمو شبّهوني كتير
هوّي ترك جسمو وأنا جسمي
صعبه تا يحمل هالإسم الكبير
ـ3ـ
وهونيك بالوادي يا قنوبين
زهور البنفسج ليش دبلانين؟
شربل إذا بيغيب رح يرجع
(عرندس) بقي بقلوب الملايين
ـ4ـ
ويا راسكيفا ابنك مجالو
وسع الدني، خالد بأعمالو
لمّن ولد بطرابلس فنّان
كنتي الحبيبه العايشه ببالو
ـ5
بيشهد التلّ وساحة النجمه
بطرابلس.. ع أجمل مشاوير
نمشي سوا.. تضحك لنا الكلمه
ومنّو لحالو يبتدي التفكير
ـ6ـ
يا شربل الفنّان شو بقلّك
ما في شعر بالهجر يوصلّك
سآل الأرز عن مطرحك بيقول
بقلب العلم عم إحفر محلك
**