يوم فوزه بجائزة شربل بعيني
ـ1ـ
كيف بدّي بالشعر حاكيك
وإنت الشعر.. والشعر عايش فيك
بيوت المعنى بتعرف فْضالك
عمّرتها ع أعظم مداميك
ـ2ـ
ع الحرف لمّا بيوقع خيالك
منّو لَحالو بيركض يحييك
يا لطيف انْ شحِّتْ رجالك
وحدك بتكفي.. ربّنا يقوّيك
ـ3ـ
مجد الزجل بيعيش بعيالك
والد وإخوه.. مجدهم كافيك
بِـ عيلة مخاييل نيّالك
ع الإستقامه قدرت تربيك
ـ4ـ
كبير.. حقّك تقشع بحالك
عالي.. وشعرك قادر يعلّيك
بطلب تا ألله يزيد أمثالك
كرّمتني بأشعار شو أشعار
وعارف أنا من الصعب تا كافيك
**
انت اللطف
من وحي قصائد الشاعر الصديق لطيف مخائيل
إذا بالهجر رح حمّي المكاوي
أكيد بزيد ع المنبر قساوه
انت اللطف طالع من يمينك
لكن صرت عم شوف البلاوي
من فليتان رح بتعيف دينك
ومع علتان شو بدك تساوي
بدنية كذب مش معروف مينك
ع سبع الغاب عم بيصيح واوي
انقلت الشعر بتوطي جبينك
لأن الشعر بيزيد النقاوه
مرضى الشعر رح تدخل عرينك
وداوي انكنت رح تقدر تداوي
**
غربة وطن
تكريماً للشاعر لطيف مخايل على كتابه غربة وطن
ـ1ـ
يا لطيف.. الشاعر الفنّان
إنت الأدب.. والحب آدابك
إسمك لمع باللطف.. بالتحنان
سكنت القلوب.. سآل أصحابك
في ناس قالوا الشعر كيف ما كان
ووقف الشعر ناطور ع بوابك
حقل العزيمه غنّتْ بلبنان
من شعرك.. المقهور ع غيابك
ع الأرز شفتك شالح الألوان
وخايف ع أرزه مزيّنه غابك
لو جنّ ألله وغرّق الأكوان
بيعيش أرز الرب بكتابك
ـ2ـ
"غربة وطن" هالإسم كلّل شيبتي
من نص قرن رفيق عمري وغربتي
تاري الوجع لمّا تفارق موطنك
بيكسر الرقبه.. وهيك كسَّر رقبتي
انشالله بترجع.. والفرح بـ معجنك
تخبز فرح للناس.. تلغي مصيبتي
إنتْ قادر يا لطيف.. ومعدنك
معدن دهب.. موجود كلّو بعلبتي
وزّع دهب.. لا تخاف، هيدا مخزنك
لو متّ.. أوعا تقول مش رح إفتحا
بردة معنى بتفتحا بـ غيبتي
ـ3ـ
بسميك شاعر.. ما غلط مره معي
بسمّيك خيي.. والأخوّه مرجعي
بسمّيك إبني.. والإبن رمز الهنا
لكن "بو حاتم" زتّ كلمه بمسمعي
اسمحلي يا شربل صعب إعطيك الجنى
هيدا الصبي محفور إسمو بأضلعي
هيدا إبن.. ما بيخلقو إلا أنا
والألمعي بيكون بيّو ألمعي
**
