جبران

يوم منحي جائزة جبران العالميّة لعام 1987

ـ1ـ

جُبْرَانْ.. صَعْبِه نِجْمَعُو بِحْرُوفْ

كْتَابْ الدِّنِي مُشْ سَايِع حْرُوفُو

وِبْكلّ بُقْعَه مْنِ الأَرضْ مِنْشُوفْ

أَجْيَالْ عَمّ بِتْبَوِّس كْفُوفُو!

ـ2ـ

جُبْرَانْ.. يَا جُبْرَانْ حَاكِينِي

لُبْنَانَك الْـ حِبَّيْتْ رَحْ بِيضِيعْ

مْلايِينْ.. عَمْ بِتْخَافْ دَزِّينِه

مِتْل الْمَوَاشِي شَعِبْنَا بِتْبِيعْ!

ـ3ـ

قَالُوا: زَعَامِه.. بَخّرُولاَ شْوَيّْ

دُخَّانْ بَخُّورَا خَنَقْ أَطْفَالْ

عَاشُوا سَوَا عَمْ يِشْرَبُوا مِنْ مَيّْ

تَلْجَاتْ.. عِرْقِتْ فَوْق رُوسْ جْبَالْ.

ـ4ـ

شُو بَاكْ سَاكِتْ؟!.. خَبِّرُنْ.. قِلُّنْ:

لُبْنَانْ بَاقِي مَوْطن الأَدْيَانْ

وْلَوْ مَا بْيِقْدرْ يِحْضنُنْ كِلُّنْ

مَا كَانْ أَللَّـه كَوَّنُو "لُبْنَانْ"

ـ5ـ

وْهَـ الْجَائزِه.. اللِّي حَامْلِه إِسْمَكْ

مُشْ حَقّ إِنِّي إِحْمِلا وَحْدِي

سْمَحْلِي إِذَا بِتْقَاسْمُو لْرَسْمَكْ

مَعْ نَاسْ أَغْلَى مْنِ الدِّنِي عِنْدِي

ـ6ـ

أَقْلامْ جبَّارَه.. مَا أَشْرَفْهَا

بِوْجُودْهَا مَا فِي أَدَبْ عَايِزْ

لَوْ كِنْتْ يَا جُبْرَانْ تَعْرِفْهَا

بْتِحْتَارْ كِيفْ تْفَرِّق.. جْوَايِزْ!

**