ألقيتها في ندوة رابطة إحياة التراث العربي ـ سيدني، 2/12/1988، حول كتاب (مشوار مع شربل بعيني) لمؤلّفه الاستاذ كامل المر.
ـ1ـ
مِشْوَارْ..
دَخْلَكْ كِيفْ هَـ الْمِشْوَارْ
قْدِرْتْ إِنَّكْ تِقْطَعُو
وْبِاللَّيْلْ وَحْدَكْ تِرْجَعُو
وْيَا مَا بَشَرْ عَمْ يِفْزَعُوا
تَا يِفْشَخُوا بِنْهَارْ؟!
ـ2ـ
مِشْوَارْ..
مَا رْضِيتْ إِنُّو يِختفِي
وْيِتْسَتَّرْ بْقُبْع الْخَفِي
طِرْطَشْت دَمَّكْ عَ الْوَرَقْ
وِنْصَبْتْ حَرْفَكْ عَ الشَّفَقْ
تَا كِلّ مَا الصُّبْح انْدَلَقْ
يُوقَعْ بِجرْن الْمَعْرِفِه.
ـ3ـ
قَبْلَكْ.. مَا كَانْ الْـ كَانْ
وْلاَ الْحَرْفْ حَسّْ بْقِيمْتُو
غِسَّلْتْ وِجُّو.. بَانْ
كلُّو وَفَا وْإِيمَانْ
وْعَ شْفَافْنَا تِرْنِيمْتُو
ـ4ـ
شِفْت الْوَطَنْ مَرْسُومْ
وِمْخَزّقَه الصُّورَه
نَزّ الْجَبِين هْمُومْ
بِالْقَلْبْ مَحْصُورَه
حْمِلْت صَوْت الرِّيحْ
وْقِلْتِلّنَا: قُومُوا
نِرْسُمْ فَرَحْنَا زِيحْ
بْعَصرْ كِيفْ مَا نْزِيحْ
عَمْ يِنْفُخ سْمُومُو
ـ5ـ
يَا رْفِيقْ دَرْبِي.. لَيْشْ
بَعْدُنْ مَا فِهْمُوا عْلَيْكْ
بْيِمْشُوا عَلَى الطِّمَّيْشْ
وْمَا بْيِمِسْكُوا بْإِيدَيْكْ؟!
بَدَّكْ أَدَبْ إِنْسَانْ
يِخْلَقْ شَعبْ فَنَّانْ
يْلَوِّنْ سَمَا أَوْطَانْ
عَمْ تِحْمِيَا بْعِينَيْكْ.
ـ6ـ
يَا مَا سْأَلْت الْقَلْبْ
عَنْ شَخْصَكْ الْغَالِي
الْـ ضَوَّى شْمُوع الْحُبّْ
بِـ عَتْمِة لْيَالِي
خَلِّت شْعُوب تْضِيعْ
عَ مْفَارِق الأَيَّامْ
لِلْحقْد إِبْنَا تْبِيعْ
وْتِتْيَزَّرْ بْآلامْ
قَللِّي الْقَلبْ: لا تْخَافْ
كَامِلْ.. كَمَالُو نُورْ
لْوَحْدُو إِذَا بْيُوقَافْ
بِيحَارِب الدَّيْجُورْ
ـ7ـ
وْصَارُوا اللَّيَالِي يِغْرَقُوا
بْنُور الْفَجرْ
وَقْت اللِّي حَرْفَكْ زَوْزَقُو
وْجَنّ الْقَهرْ
وْحِمْلِ الْحَسَدْ عِكَّازْتُو
وِالإِحْتِيَالْ
شَافْ بْعُيُونُو جْنَازْتُو
وِارْتَاحْ بَالْ
خَلِّيكْ نجْمِةْ حُلْمْ
بْلَيْلْ قِيلْ وْقَالْ
تِفْرُش زْهُور السِّلْمْ
وِتْفَرِّح الأَطْفَالْ
وْتِهْدِي بْنُورَا عْيَالْ.
ـ8ـ
شُو بْقُولْ.. نِشْف الصَّوْتْ
بْغُرْبِه.. ضِحِكْهَا سِلّْ؟!
شُو بْقُولْ.. وْطَيْف الْمَوْتْ
مْنِ عْرَاسْنَا بِيطِلّْ
وِبْلادْنَا بْتُوقَعْ
بِـ بِيرْ مَاضِينَا
بْتِنْدَهِلْنَا نِرْجَعْ
وْبِتْسَكِّرْ الْمِينَا
وِالْقَلْب.. مَا بِيهِمّْ
لَوْ دَابْ مِنْ قَهْرُو
الِمْهِمّْ يِدْفَعْ دَمّْ
لِلْحَاكِمْ بْأَمْرُو!!
ـ9ـ
جُوعْ الْجَسَدْ مُشْ جُوعْ
جُوع الْفِكرْ أَعْظِمْ
كلُّو أَسَى وِدْمُوعْ
وِعْقُولْ تِتْأَلَّمْ
وْعَ طُولْ عَمْ شُوفَكْ
كَامِلْ بِـ مَعْرُوفَكْ
وْمَعْ كلّ طَالِبْ عِلْمْ
بْتِتْقَاسَمْ حْرُوفَكْ.
ـ10ـ
وِالرَّابْطَه اللِّي عْطَيْتْهَا قَلْبَكْ
دَقّْ رَاسَا بِالسَّمَا
وْضَوِّتْ قَمَرْ شَعْبَكْ
بْإِيدَيْنْ..
إِيدْ الْمَجدْ قَعْدِتْ تِرْسِمَا
بْعِينَيْنْ..
صِرْنَا بَلاهَا نْضِيعْ
وِنْغِصّ بِالْكِلْمَاتْ
نِشْبَعْ مِنِ التِّجْوِيعْ
وْنِبْرُدْ مِنِ الآهَاتْ.
ـ11ـ
بْحَرْفَكْ غَنِي
وْلَوْ تِفْتَحُنْ إِيدَيْكْ
بْتُوقَعْ دِنِي
عَ مْطلّ.. حَنّ عْلَيْكْ
بْوَادِي كْفِرْحِلْدَا
عَ تْلاَلْ.. فَرْشِةْ طِيبْ
حَاك الزَّهِرْ جِلْدَا
وْيَا رَيْتْ فِيِّي جِيبْ
مِنْ ضَيْعتَكْ شِي غُمْرْ
رِشُّوا بْدَرْبِي.. وْغِيبْ
بْلَحْظَاتْ أَحْلَى عُمْرْ
وْيِدْنَقْ بِـ قَلْبِي الْجَمْرْ
ـ12ـ
مِينْ قَالْ إِنُّو الْمَوْتْ
رَحْ يِقْدرْ عْلَيِّي
وْقَلْمَكْ شَلَحْنِي صَوْتْ
عَ شْفَافْ غِنِّيِّه؟
وِالصَّوْتْ مَا بِيمُوتْ
وْلاَ بْيِنْقِبِرْ بِسْكُوتْ
بْيِصْرُخْ بِـ إِدْن النَّاسْ
لا تْأَمّنُوا لْطَاغُوتْ
عَرْشُو خَشَبْ تَابُوتْ
مْطَعَّم بْيَاقُوتْ
وِمْزَيَّنْ بْإِلْمَاسْ
مِنِ عْضَامْ النَّاسْ
**
كامل
قدّمت بها الأستاذ كامل المر في يوم محمد زهير الباشا عام 1989
رَبَّى الْحَرفْ
بْأَصْعَبْ ظَرْفْ
وْضَوَّى بْكِلْماتُو مْشَاعِلْ
مَهْما قُولْ
بْشِعْرِي.. وْجُولْ
مَا بْيِطْلَعْ حَكْيِي كامِلْ
إِلاَّ ما يْوَافِقْ كامِلْ
**
كامل مات
ـ1ـ
يا كفرحلدا.. حبيبك مات
كامل المر.. الكان بو الهمّات
مشيت حدّو بغربتي مشوار
وصّل طريقي لفوق هالغيمات
ومن دون وعي حسّيت كامل طار
وصفّى نجم.. عم تعشقو النجمات
وكيف ما مشي عم تسطع الأنوار
هيدي الحقيقه.. مش حكي منامات
وزّع حروفو بين هالأقمار
وتا ينام فتحت بيتها الأشعار
وودّع الغربه.. وعاش بالكلمات
ـ2ـ
قللي تا إحكي كلمتي وإمشي
وما يرفّ ع دروب الظلم رمشي
ورشه العمر.. كلاّ شقا وآلام
ومجبور إنو تدير هالورشه
وتا يعيش شعري بغربة الإيام
قللي تا حسّك للطبع قرشي
ومنشان حقّق بالهجر أحلام
قللي تا عمّر بالحرف عرشي
وقللي تا حارب بالوطن أزلام
فوقُن زعيم بيقتل بيرشي
كامل المر انمات ما بينلام
عارف إذا بيموت رح بيعيش
حامل بإيدو هالدني كمشه
ـ3ـ
كامل المر.. حكاية الغربه
هاجر ع سيدني وحالتو صعبه
كان إسمو بالوطن معروف
حامل رسالة حق مش كذبه
ع شطوط كلماتو أمل بتشوف
همومو الوحيده ينتصر شعبي
عندو اللعب بيكون ع المكشوف
وعندو الزعامه بالوطن حربه
صحبة عمر ما فرّقتها ظروف
من هيك جمّعني بكتابو حروف
ومن هيك خبّيتو أنا بقلبي
**
كاملنا
قدمت بها الأستاذ كامل المر عام 1989
صَعْبِه كْتابْ يْشُوف النُّورْ
إِلاَّ ما يْصِفّ حْرُوفُو
فاح مْنِ حْرُوفُو بَخُّورْ
تَا يْعَطِّرْ مَرْج كْفُوفُو
وْكل ما حْرامِي يِشْهَدْ زُورْ
عَ الْكِلْمِه.. عَمّ نْشُوفُو
حامِلْ سَيْف وْعَمْ بِيدُورْ
تا الْحَقّ يْقَوِّي صْفُوفُو
كامِلْنا.. كامِلْ مَشْهُورْ
بِـ حُبُّو وِبْمَعْرُوفُو
**
