سليم كرم

يوم زارنا النائب سليم كرم 1977

ـ1ـ

يا مِيةْ هَلا بِـ طَلّتَكْ يا مِيةْ هَلا

يا ابْنِ الْجِبال الْـ رَكَّعِت نسْر الْفَلا

شَعْبَكْ قَبل مِنَّكْ حِكِي عَنّو الزَّمانْ

وِالْيَوْم زَلْغَطْلَكْ تارِيخْ الْمَرْجَلَه

ـ2ـ

أَيَّا فَخْر.. أَيَّا فَخْر.. قُولُوا

وْما افْتَخَرْ بِـ ضَيْفْنا وْطُولُو

شَبح الرَّدى مِنْ طَلّتُو قَلْبُو ارْتَجَفْ

وْوَصَّى قَبلْ ما يْمُوتْ إِنُّو يْجَنّزُولو

يا زارع الأمجاد بِحْقُول الشَّرَفْ

جْوانِحْ الأرزاتْ حَدَّكْ عَم يْجُولُوا

بْلادي قَلبْ وَاحِدْ.. هَيْدا شِي انْعَرَفْ

فَوْق مِنَّا مَشْلَحْ الْحُبّ انْشَلَحْ

وْحَدّ مِنّو مْلايْكِي بِيبَخّرُولُو

ـ3ـ

وْمِجدليَّا.. زادْ مَجْدَا يا سَلِيمْ

مِنْ يَوْم ما بْدَمَّك سْقِيت تْرابْها

بَسّ أَللَّـه كانْ يَوْمِتْها حَكِيمْ

ما رادْ إِنُّو يْزِيدْ فَوْق مْصَابْها

وْعَ نُورْ شَمْعَه انْضَوْيِت بْإِيدْ الْيَتِيمْ

اجْتَمْعُوا أَهالِيها وْسَجَدْ غِيَّابْها

وْصَلُّوا سَوَا أَيَّامْ لِلرَّبّ الرَّحِيمْ

ما يِحْرُم الأَرْزاتْ شَيْخ شْبابْها

ـ4ـ

بِزْيارْتَكْ يا جَارْ فِرْحُوا قْلُوبْنا

زْيارِةْ تَواضُعْ مِنْ صَدِيق كْبِيرْ

كانْ يِغْزُلْ مَجْد فَوْق دْرُوبْنا

يْرِشّ السّلام زْهُورْ عَ حْفافِي الْغَدِيرْ

بُكْرا إِذا تْدَوَّنْ تاريخْ شْعُوبْنا

بْتِنْكتبْ صَفْحاتْ مِنْ نُور وْعَبِيرْ

عَنْ بَدْر ضَوَّى تَا يْمَحِّي غْرُوبْنا

وْيِزْرَعْ الأَفْرَاحْ وِيْعِيش الضَّمِيرْ

ـ5ـ

شُو بْخَبّرَكْ يا جَارْ عَنْ أَحْوالْنا

تَا فِشّ قَلْبِي شْوَيْ.. ما عِنْدِي مَجالْ

بْيُوتْنا انْهَدْمِتْ عَ رُوس عْيالْنا

وْقِلْنا فِدَى لُبْنانْ عَ كلّ حالْ

وْحَتَّى ما نِنْسَى الْـ ماتْ مِنْ أَبْطالْنا

بْساحاتْنا عَمْ يِنْبِنِي تِمْثالْ

يْمَثِّلْ شَبابْ اسْتَشْهَدُوا كِرْمالْنا

منْ مِجْدليَّا.. وْغَيّرها مْن الزَّاوْيِه

ماتُوا سَوَا وْصانُوا الإِسْتِقْلالْ

ـ6ـ

أَهْلا وْسَهْلا فِيكْ بِـ أَبْعَدْ حِمَى

مِنْ كِلّ قَلْبِي بْقُولْها وِبْعِيدْها

بْإِسْمِي.. بْإِسمْ غِيّابْنا هَـ الْكُرَما

وِبْإِسمْ ضَيْعَه الْيَومْ لَيْلِة عِيدْها

بِصْرُخ بِأَعْلى صَوْت يُوصَلْ لِلسَّما

بِقْلُوبْنا فِي كْرُوم حُبّ وْعاطْفِه

فُوتْ دَخْلَكْ قَطِّف عْناقِيدْها

**