ـ1ـ
أنطون يا أنطون.. نيّالك
ع أرض سيدني نقلت عرزالك
عرزال، فيه تغنّت الأشعار
بيربط الوادي بقمة جبالك
هونيك.. صوتك رافق الأطيار
وحبيت فيه تأسس عيالك
وهالضيعة اللي متلها ما صار
افتخرت بناس كبار.. أمثالك
ع غيبتك.. عبّت دموعا جرار
وبعدا بإيدا حامله شالك
ومار جرجس فارسا المغوار
مشتاق حدّو يمرق خيالك
وأنت شاعر بالشعر جبّار
بْـ (يا ضيعتي).. بينت أفضالك
بيوت الشعر زيّنتها بأزهار
وع كل باب حفرت موالك
ـ2ـ
وبغربتك.. مهما دولابك دار
تأكد بأنو المجد رسمالك
يا شاعر الماشي ع جمر النار
بإيد اليمين حملت غربالك
الخانوا الوطن، يا صديقي، كتار
ان تعبت يمينك حضّر شمالك
لا تخاف لو رشّوا عليك غبار
ببيتين شعر بتخلق رجالك
رجالك قصايد.. للوطن زنّار
بيحموا أرز.. بالإسم نادالك
ببيتين شعر.. بتكشف الأسرار
بتفضح السرقوا مالنا ومالك
ـ3ـ
بعرف أنا.. سهران ليل نهار
رغم الهجر عم ينشغل بالك
ولو تنطفي النجمات والاقمار
بْتِضوي بعتم الليل مشعالك
كرمك وطن.. ع الكرم ضلّ سهار
مليون ثعلب ناطر غلالك
كرمك وطن.. مهما الوطن ينهار
منّو بينبع فيض شلالك
لرجوعك اشتاقت حجار الدار
وأهل زغرتغرين يا أنطون
بالقلب بنيوا حجار تمثالك
