ابراهيم.. أهلا فيك يا قاضي الأمم
شرّفتنا بِـ هالصالون المحترم
ست البهاء كتير عرفت قيمتك
روح العدل، أخت الحرف، بنت القلم
خبرتني عن عدالة سيرتك
اللي مدهبي بأحكام متلا ما انحكم
خبرتني كيف تحمي دولتك
بقصر العدل ميزانك بيرجح شمم
وفي ناس عبدوا المال.. كرجت دمعتك
لمن شفت قصر العدل عم ينهدم
شوهوا بأحكام سودا أرزتك
وقدام عين الحق هالشعب انظلم
قدموس ابن المجد، دهّب كلمتك
وبيروتنا أم الشرائع والحِكم
ليش الوطن منهان؟ قللي بدمتك
وأهلنا بلبنان قدّامن غنم
كرمال أعظم شعب، علّي صرختك
مش حق طول العمر يتحمّل ألم
بـ ليلة الإفطار ضوّي محبتك
نحنا منفطر ع المحبه والكرم
بـ رمضان تكرّمت.. يا فرحتك
صمنا معك.. تا نكون أقوى من العدم
جايي تا غمّس لقمتي مع لقمتك
وهيك يا ابراهيم بتزيد النعم
قاضي إنتْ.. علاّم، تحيا عيلتك
رح حلفك تحمي لِنا أشرف علم
شربل بعيني
27 شباط 2026
